戀愛節目牽手後（下）
上集：https://bit.ly/3gCPJqn
我要結婚嘅消息，已經話晒畀親戚朋友知，突然終止婚禮，令我好尷尬。
不過人生嘅嘢往往難以預期，半個月後，佳佳發現自己有咗。
我係愛佳佳嘅，作為男人，我都應該負責任，就同佳佳結咗婚。
但結婚嗰一刻，我硬係覺得，呢場婚姻冇我想像中咁幸福。
結婚後，雖然佳佳成日畀說話我聽，嫌我冇錢、嫌我打機、嫌我對佢唔夠好，但每次我都哄得番佢。
「其實我哋都唔錯啦，比上不足，比下有餘。」
「不如你退咗嗰個女嘉賓Group啦，成日同人比較，自己都唔開心。」
直到有一次，佢參加咗一場婚宴，係以前戀愛節目嘅女嘉賓結婚，嫁畀一個煤礦老闆。
婚禮極盡奢華，新娘好幸福，穿金戴銀，結婚禮物係一棟豪宅。
佳佳不斷描述婚禮嘅詳情，最後居然講：「如果我仲係節目度就好啦，可能今日就係我做新娘……」
「講到尾，你都係嫌我窮啫。」我火都嚟：「咁你咪上番節目度企囉。」
「我想死，我咩希望都冇啦。」佳佳一路喊，一路仲睇住個女嘉賓Whatsapp Group。
「夠啦！」我搶咗佢部手機：「又係女嘉賓？你今年已經34歲，要做人阿媽啦，唔通你永遠活喺舞台上咩？醒吓啦。」
佳佳嬲到唔肯食飯，我直情同佢講：「你嫌我窮丫嘛？你再係咁落去，我一蚊都唔畀你。」
結果，佳佳終於食咗啲嘢，我以為咁就算冇事。
深夜，一陣劇痛令我驚醒。
我見到披頭散髮嘅佳佳，將刀狠狠咁刺入我身體裡面，一刀又一刀。
佳佳念念有辭：「都係你害咗我！如果唔係你娶我，我唔駛搞成咁，我唔駛做最差嗰個！」
我捂住傷口，一仆一碌咁衝出門口，持刀嘅佳佳追住我。
「我錯啦佳佳，你原諒我啦！」我一路叫，一路跑到後樓梯，我流咗好多血，佳佳已經追到我。
有一剎那，我想伸手將佳佳推開。
但我又諗到，佳佳懷住我嘅BB，作為男人，點可以郁手傷害自己嘅妻兒呢？
就係嗰一剎那嘅猶豫，佳佳再捅多我一刀，我終於失去反抗能力。
失去意識前一刻，我忍唔住問自己，其實一直以嚟，我真係完全感覺唔到，佳佳想要豪華嘅生活咩？
只不過，我以為，我嘅愛可以打動到佢。
唉，一個人真正想要嘅嘢，係好難改變。
如果畀唔到佢，不如唔好惹佢。
—完—
真人真事改編自「非誠勿擾女嘉賓殺夫案」。
身家頗豐的男嘉賓張天翼出場時，女嘉賓王佳以一番感人的愛情宣言，打動了張天翼的心，兩人成功牽手。
但節目結束後，張天翼拒絕再與王佳聯繫，令王佳十分傷心。
一直關注王佳的粉絲何嘉文，努力安慰王佳，用真心和俊朗的外表，打動了王佳的心。
但兩人準備結婚時，王佳開始與其他女嘉賓攀比，並認為何嘉文只是一個小職員，配不上自己，打算取消婚約。
後來，王佳意外懷孕，不得不與何嘉文結婚。
婚後，王佳經常與何嘉文爭執，嫉妒其他女嘉賓擁有更好的生活，自己的不幸則是何嘉文所導致的。
最後，王佳親手把何嘉文斬死，何嘉文臨死前不曾還手。
王佳產子後被判監。
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #戀愛節目牽手後
Search